أنا رايح المدرسه/بلد شهادات

بسم الله الرحمن الرحيم

ياأأأأأأأأه المدرسة حاجة حلوه قوي

مدرسة ناهيا الأبتدائيه كلنا عدينا بالمرحله دي بس انا بقي مكنتش باخد حد معايا المدرسه واعيط زي ولاد اليومين دول

انا كنت بحب المدرسه بس علي شان كانت ارحم من الفقي وحضراتكوا عارفين ليه

طبعاً ماشي في طريق نظيف قبل ما تدخل المدرسه علي يمينك في الشيخة امينه دي بقي حافظه قرأن وبتعرف تقرأ وتكتب

وبتعلم نساء البلد في البيت دي لوحدها حكايه كانت بتبيع لينا مكرونه يعني قبل ما تدخل المدرسه تاخد طبق مكرونه لزيز

وتاخد كماله نصف طبق ببلاش ودايما كانو يقولو لنا في الفصل متكلشي حاجة من الشارع بس مين اللي بيسمع الكلام بقي

وكان في بياعين كتير قوي زي متقول كدا سويقه اللي بيبيع برتقال واللي بيبيع سندوتشات واللي بيبيع لب واللي بيلاعب الأولاد بالبندقية تنشل جوه الدايره تاخد صوره كل ده بره المدرسه ندخل برجلينا اليمين العالم الجديد اللي فيه1+1=2
وهنتعلم الفرق بين الألف والكوز الزره مع ان الأثنين شبه بعض بس الكوز الزره بيتاكل

اول يوم بقي كل واحد جايب ابوه او والدته علي شان يعرف الفصل بتاعة ويوصي عليه طبعا علي شان يقعد في الديسك الأول

حاجه غريبه قوي اهم حاجة تتسئل فيها انت قاعد ورا ولا قدام طبعا في ناس

بتحجز ورا وتنام مرة مدرس ظبط عيل بيشخر في اخر ديسك بلاش اقول اسمه

انا عارف لحد دلوكيت مين اللي كان بيدرس لينا في اولي ابتدائي الأبله / سيده حاليا بيقولو الميييس والفصل اللي جنبي الأبله / هاله

انا كنت في اولي اول وفاكر حوالي نصف الفصل وكنت قاعد في الديسك الأول يعني شاطر اه

جنب ابن حضرة الناظر الشحات الرفاعي واسمه محمد الشحات يعمل محامي حاليا

ومن اعز اصدقائي في الفترة دي عادل السهيت وامام الديب وفارس الديب بس هما شغالين حاليا في مهن ابائهم

وبشوفهم حالياعلي فترات بعيده ।

نرجع بقي الفصل ونطلع الكراسه والكتاب بسم الله الرحمن الرحيم

الدرس الأول / امل وعمر

الدرس الثاني / امل اكبر من عمر

الدرس الثالث / في الحظيره

الدرس الرابع / عم عمر يشد الكرنبه

الدرس الخامي / امي وابي

العلم نور صحيح حاجات حلوه فاكرين الأيام دي قبل الفسحة بقي تيجي تلاقي حاجة بيسموها علي ايامنا التغزيه

تطلع ايه بقي / حلاوه طحينيه " بسكوت "جبنه "

كل واحد يا ولاد يطلع ورقه ويحطها علي الديسك واثنين يعدو عليك وانت قاعد مكانك يخرط خرطة كبيره ويحطهالك علي ورقتك

وكان الخير كتير بعد ما يعدي ويوزع علي المدرسه يفيض وممكن يوزع تاني

مش عارف الحاجات دي اختفت ليه والطلبه مش لاقيه حتي عيش حاف ؟

هيه هيه هيه هيه هيه .........فسحهههههههههههه

فيه حاجه مكسوف اتكلم عنها علي شان لما تيجي صورتها قدامي واتخيلها بقرف (الحمامات)

حمامات مدرستنا كانت شيئ لا يطاق لو مزنوء قوي امسك نفسك لحد ما تروح احسن والميه ممكن تكون شغاله والحنفيات

مفتوحه ومحدش يعرف يقفلها وشغاله علي اخرها...... يا مفيش مياه خالص..... ودور بقي علي حد معاه زمزميه فاكرين شكلها

وبعد ما تشرب تروح عند الباب الحديد تلاقي البائعين بيمدو ايديهم من الباب الحديد علي شان يبيعوا سندوتشات المربي والجبنه

لازم تكون جامد علي شان تعرف تجيب سندوتش؟؟؟؟ واحد في اولي ابتدائي بيزاحم واحد قد ال ,,,,,,, في سنه سته।

بعد الفسحه في طابور تاني يلا معايا شد حيلك زراعين اماما مد***** زراعين اسف خفض*****

وبعدين نروح الفصل في قمة التعب من اللعب والتنطيط كان في خناقات بتحصل بين الفصول1/1 مع 1/2

وانتو عارفين بقي النشيد.....

اولي تاني ياخيبتها اولي اول ضارابتها .......ويا بتوع الصبح يا افنديه و يا بتوع الظهر يااااااا؟؟؟؟؟؟

لعب عيال يعني ........كان في تيرم الصبح والتيرم الثاني الظهر.....

والجرس يضرب هيهههههههههههههه ونروح تلاقي بتوع الظهر منتظرين بره المدرسه

انا بروح وجهز نفسي للفقي وبعد مااجي من الفقي (اكتاب)

اكتب الواجب وبالليل اسمع اللوح لوالدي اللي حفظته في الكتاب وطبعا لو مش حافظ باخد

بمناسبة الواجب المدرسي كان في حاجة تحرق الدم في اجازة الترم الأول الواجب يطلع ايه بقي .............

اكتب الكتاب من اوله لحد اخرة خمس مرات او عشره يعني مفيش راحة لحد ما ايدك تتهري من الكتابه تبقي اجازه ازاي ؟؟؟؟

وهكذا في باقي سنوات الأبتدائي لحد ماجت سنه خمسه والحكومه مشكورة لغت سنه سته ووقعت مع الدفعة المزدوجه

في سنه خمسه كان في علي يميني في الديسك عصام الزمر وعلي شمالي واحد اسمه عادل طويل قوي وانامحشور في النص في حصة الأملاء لو خبيت كراستي كانو بيعصروني ماشاء الله هما تجار حاليا

جيش بحاله هيطلع اولي اعدادي خمسه مع سته

ونجحت في سنه خمسة بمجموع كويس جدا ............

وكفاية بقي لعب عيال علي شان الجد هيبدأ وهنروح اعدادي فاصل ونذهب الي المدرسه الأعداديه............