الأنشطه الطلابيه في الجامعه

بسم الله الرحمن الرحيم

الأنشطة الطلابيه في جامعة القاهرة

بعد انتهاء اليوم الأول بحمد الله وفي اليوم الثاني تعرفت علي صديقين هما أ/ سعد من بني مجدول

وصديقي أ/ سامي من البساتين الأول من الأخوان المسلمين والثاني يتبع الفكر السلفي كلاهما كانا

يبدآن اليوم الدراسي قبل المحاضرات بتلاوة ايات من القرآن في المدرج وكنا نذهب سويا الي مسجد

كلية التجارة لأداء الصلوات معاً, قلت سابقا اني احببت مخالطة جميع التيارات الفكريه والمشاركة في

جميع الأنشطه الطلابيه ؛اول نشاط شاركت فيه في جامعة القاهره هو تكوين اسره مثل باقي الأسر

ولكن هذه الأسره لها طبيعة خاصه

( اسره لمتحدي الأعاقه)

حيث تصادف دخولي الجامعة ان التقيت

بأربع اصدقاء معاقين من ناهيا هم أ/ حمدي علي أ/ احمد نصر أ/ ابراهيم رزق أ/فهد الفولي*فقررنا نحن

ومجموعه اخري من ابناء الجامعه المعاقين والمكفوفين تكوين اسره نمثل الجامعه في المسابقات

ونشارك بما يتاح لنا من انشطه تتناسب مع طبيعتنا ورشحنا احد اساتذة كلية الآداب ليقوم بالأشراف علي

الأسره وتم الأتفاق علي ذلك وقام أ/ مفيد شهاب بالموافقه علي الأسره وتم تحديد مقر لها في مدينة الطلبه

( مقر مكتب التنسيق) وانضم الينا من ابطال الجامعه أ/ صبري عبد الرحمن بطل رفع الأثقال في الأوليمبيات

وأ/ شريف الحسينس وابطال في العاب القوي وتم تعيين موظفين من الجامعه للأشراف علي
انشطة الأسره وعلي رأسهم أ/ ناصر ابو زيد المسؤل عن الأسره
وبدا نشاط الأسره بعمل رحلات الي* دريم لاند *ودريم بارك* وفي نهاية العام *معسكر بلطيم* بمدينة كفر الشيخ

وفي معسكر بلطيم كان هناك انسجام بين الطلبه المكفوفين والمعاقين حيث كان معسكر مثل معسكر الجيش حيث

فوجئنا ان المعسكر خيام وغير مجهز والمسافه بين صالة الطعام والشاطئ كبيره وكلها رمال

وكنا نستيقظ لنري كائنات بحريه تحت السرير ولم يكن المعسكر كما هو حاليا حيث تم رصف المعسكر وتجديده

وكنا نقوم في نهاية اليوم بعمل امسيات واستعراض المواهب وحفلات سمر لتوزيع جوائز المسابقات وقد حصلت

علي جائزة المركز المركز الثاني في لعبة الريست ( مصارعة الزراعين)

من المواقف الطريفه اقامة مباراه كرة قدم بين المشرفين الأسوياء وفريق من المكفوفين والمعاقين

والتي انتهت بفوز الفريق الثاني : كانت هناك حالات متفاوته في درجة الأبصار بالنسبه للمكفوفين فبعضهم لايري

مطلقا وأخرون يرون بنسب ضئيله جدا .

وتتم اجتماعات الأسره في مركز الأنشطه الطلابيه بمقر المدينه الطلابيه (مكتب التنسيق ) واثناء اجتماعات

الأسره بمقر النشاط شاهدت شئء غريب

طلبه تتعلم حرف مختلفه فاقتربت منه لأتعرف علي هذه الأنشطه وتنقسم هذه الأنشطه الي:

اولاً: مركز احياء التراث " ويتعلم فيه الطلبه حرف قاربت علي الأندثار منها:شغل الأرابيسك/ النقش علي النحاس/ اعمال التطريز " الخياميه" ويوفرهذا المركز جميع المستلزمات والمدربين العاملين بهذه المهن , وعمل المعارض

ثانياً: نادي العلوم" ويضم اصحاب المخترعات العلميه ومن لديه فكرة اختراع يقوم بعرضها علي احد دكاترة هذا التخصص ويتم مناقشتها علميا وامكانيه تنفيزها, ويقوم المركزبتوفير مستلزمات الأختراع, مع عمل دورات كمبيوتر

ثالثا : النشاط الديني والثقافي " ويهتم بالمسابقات الثقافيه مثل مسابقه بين اروقة الثقافه ويتم اصدار عدد كل شهرويشارك فيه ابناء الجامعه من جميع الكليات, ويتم اعلان المراكز الأولي من المتسابقين, ومسابقات حفظ القرآن

رابعاً: جماعةالصحافه " صحافه خاصه بأخبار الجامعه والمجله الشهريه للجامعه التي تضم اخبار الكلية وابداعات الطلبه من الكليات المختلفه سواء في الشعر او القصة القصيره والمقالات الحره بالأضافه الي المنتديات الثقافيه

خامسا : جماعة الرسم والفنون التشكيليه" وتضم اصحاب المواهب في الرسم والفن التشكيلي والنحت والتصوير الفوتغرافي والتصوير الزيتي " ويتم عمل معارض لهذه المنتجات ويقوم الطلبه بتمثيل الجامعه في المنافسه بين الجامعات الأخري:

كل المجالات السابقه شاركت فيها قدر استطاعتي :

في مجال احياء التراث تحت اشراف أ/ فاطمه المشرفه علي هذا النشاط تقدمت بأستمارة للأشتراك في هذا النشط

وتعلمت علي ماكينه الأرابيسك لعمل الكراسي والمشربيات وكذللك تعلمت عمل علب مطعمه بالصدف الطبيعي والطناعي

مثل علب المجوهرات التي تشاهدونها في شارع الأزهر وخان الخليلي وفي مجال النقش علي النحاس اتذكر الطالب ايمن

المبدع في مجال النقش علي النحاس حيث يتطلب هذا المجال خطاط ماهر ليقوم بكتابة الخطوط الأسلاميه وبعض الرسومات ثم نقوم بنقش هذة الخطوط بالأزميل وسن مدبب لكي يتم تحديد الرسم علي الهيكل النحاسي اما في مجال الخياميه وهو العمل بالخيط والأبره نقوم بعمل اشكال زخرفيه علي الأقمشه مثل التي علي ستائر الكعبه وبعض الملابس اتي تزين يدويا بأقمشه ملونه يتم خياطتها يدويا وهي في القيمه اكبر من شغل الميكنه لأنها يدوي،

اما في النشاط الثقافي والديني : فكنت اشترك في مسابقات حفظ القرآن الكريم , وحصلت علي اكثر من شهادة تقدير وبعض المبالغ الماديه , وفي مسابقه اروقة الثقافه حصلت علي المركز السادس علي مستوي الجامعة والمركز الثامن

والمركز العاشر في اعداد متفرقه من المسابقه التي كانت تحتوي علي اسئله في جميع المجالات والتي تتطلب بحث كبير

في المكتبات

في مجال نادي العلوم كنت اشارك في مساعدة بعض المخترعين ومن امثله ذلك جهاز للبحث عن المعادن في التربه

وجهاز زجاجي لعمل اشعة ليزر ولكن لم يكن لدي اي اسهامات في الأختراعات حيث كان معظمهم من كليات العلوم والطب واشتركت في دورات كمبيوتر مع نادي العلوم في الDOS و win95 وهذه الدورات كان وقتها احدث ويندوز هوWIN95 وكان تعليم برنامج الDOS نظام عقيم ويخليك تقرف من حاجه اسمها كمبيوتر حيث يتطلب معرفة اوامر كثيره ومعقده انتهي استخدامها حاليا,

في مجال الفن التشكيلي : كان مستوايه تعبان بجوار عمالقة الفن التشكيلي والنحت واصحاب الفن التجريدي فأنا لم ادرس هذا الفن ولم ارتقي الي مستواهم فكنت ادخل المرسم قدر المستطاع ارسم بعض المناظر الطبيعيه التي تروق لي

واقوم مساعدة زملائي في عرض لوحاتهم في اثناء فترة المعارض،

كنت اقوم بممارسه هذه الأنشطه بعد انتهاء المحاضرات قدر الأستطاعه, كذلك كنت اشارك في المظاهرات

في اثناء ازمة اقليم كوسوفا وحرب الشيشان تعبيرا عن مشاركتي في مآسي المسلمين وبعد انتهاء المظاهرات

يعقد المؤتمر الختامي عند مقر رئيس الجامعد بالقبه واستمع الي ممثلي جميع التيارات الفكريه والأحزاب السياسيه

مثل الحزب الناصري / وحزب الأحرار / وحزب التجمع / وحزب الوفد/ والأخوان المسلمون كل هذه التيارات الفكريه

كان يقوم متحدث بالنيابه عن الحزب الذي ينتمي اليه ويدلي بدلوه امام مرأي ومسمع جميع الطلاب. في مظهر ديمقراطي و حضاري .

بس اللي بيتبحبح شويه في الكلام وتأخذة الجلاله كنت اسمع تاني يوم انه اتنفخ وطار . زي المفتح بيه
اما في المجال الرياضي " فكانت هناك دوره كرة قدم في ملاعب الجامعه تتم سنويا علي مستوي كلية التجارة

فأسرعت الي صديقي سامي وسعد وكونا فريق للمشاركه في الدوره وحصلنا علي المركز الثاني في الدوره لعامين

متتاليين وكنت اقف حارس مرمي وبشهادة الحضور وزملائي كنت ممتاز في الدورتين.

وفي مسابقات مجلات الحائط: كانت هناك مسابقه في كلية التجارة لمجلات الحائط واخري في رعاية الشباب

الأولي في اي موضوع والثانيه عن حرب اكتوبر وشاركت في المسابقتين وكنت اهوي تصميم مجلات الحائط

وزخرفتها وحصلت في الثانيه علي شهادة تقدير:
في مجال المعسكرات والرحلات: شاركت في معسكر( اعداد القاده بحلوان )والذي يتسم بالطابع العسكري

ويتم فيه التقاء طلبة جامعات مصر كل جامعة يمثلها فوج لمدة اسبوع كامل اقامه كاملة حيث نبدأ الساعة السابعه

صباحا بطابور عسكري وتمارين رياضيه لمدة نصف ساعه مع اخذ غياب المتخلفين عن الطابور وتقوم كل جامعة

بالأشراف علي تقديم الوجبات وخدمة الجامعات الأخري يوم كامل ويسمي ( دوريه) وتعطي جائزه في النهايه لأفضل

يوم دوري اي افضل خدمه ويحصل علي كأس مثل باقي المسابقات في الأنشطه الرياضيه والثقافيه الأخري

ويشرف علي هذا المعسكر قاده كبار في الجيش ويتم القاء محاضرات يوميه لشخصيات سياسيه مشهوره

مثل د/ فاروق الباز ود/ عاطف عبيد د/ احمد جويلي* وبعض المناصب الوزاريه الأخري ممن يعملون بالعمل السياسي
وهناك معسكر اخر وهو علي نفس نمط معسكر حلوان انشئ حديثا في فترة تواجدي بالجامعه وكان مقره المديه الجامعية

وهذه صورة الفوج الممثل لجامعة القاهرة في معسكر اعداد القاده بحلوان

وكانت هذه المعسكرات في فترة توقف الدراسه ويسمي معسكر (قادة المستقبل)

وشاركت فيه لعامين متتالين في الصف الثاني والثاث ويمنع منه طلاب الفرقه الرابعه علي اعتبار انهم قد تخرجوا

من الجامعه .وأقام مركز الأنشطه الطلابيه بعمل معسكر اخر في (مرسي مطروح)

ثمانيه ايام ويتم ترشيح الطلبه المتميزين في المجالات السابقه بالأضافه الي فريق الجامعه في الفنون الشعبيه ومنتخب الجامعه في المسرح ورشحت في هذا المعسكر وتعرفت علي اصدقاء جدد منهم أ/ مصطفي من طنطا كليه الأعلام وكان معي من ناهيا أ/ احمد فاروق فقط وهذه الصوره من شاطئ عجيبه في مرسي مطروحوفي الفرقه الثالثه رشحت لمعسكر في ((شرم الشيخ ) للمتميزين في محافظة الجيزه عن طريق

جامعة القاهرة ويتبع محافظة الجيزه وشاهدنا فندق طابا علي الحدود الأسرائيليه وصعدنا جبل الطور الذي كلم موسي ربه من فوقه وقبر النبي طالح علية السلام في الطريق ودير سانت كاترين

وحضرت ايضا معسكر ( ابو قير في الأسكندريه) وحضر الينا في هذا المعسكر فوج من فلسطين وكان بنظام المخيمات

وتعرفنا علي الشباب الفلسطيني وتحدثنا معهم في ورش عمل حول القضيه الفلسطينيه وفي نهاية المعسكر عقدت ندوه

حاضرنا فيها د/ علي الدين هلال وزير الشباب ان ذالك ,وتم افتتاح مركز كمبيوتر جديده وقام د/ علي الدين هلال

بأفتتاح المركز وطلب منا استعراض مهارات كمبيوتر امام الوزير وكنت ممن تم اختيارة وهذه صوره اثناء عمل

رسومات علي الكمبيوتر

في مجال (الدورات التدريبيه) اشتركت في دورة الأسعافات الأوليه بمستشفي بولاق الدكرور العام وكان معظم المشتركين بها من كليات الصيدله ويتم التقديم لها من خلال جامعة القاهره فقررت التقدم لهذه الدوره رغم عدم تناسبها مع تخصصي وتعلمنا فيها قياس الضغط

واعطاء الحقن في الوريد والعضل واسعافات الحروق وحالات الغرق وانقاذ حالات توقف القلب CPR
واثناء توقف الدراسه تدربت ايضا في شركة المهندس للتأمين في مجال التأمين علي الشركات ضد الأخطار المختلفه

تاج "عمه علي مجاسي"

هذا التاج وصلني من أ/ هني جابر " بحب الحريه"

وسوف اقوم بتحويله الي عمامه لأني لا البس التاج بل تلبسه الملكه اوالملك الأجنبي

*قالوا لك اختار عصر من عصور مصر علشان تعيش فيه تختار أى عصر؟

هعيش في عهد الخلفاء الراشدين وبالتحديد في عهد

عمر بن الخطاب الذي ملأ الأرض عدلا وأشارك في فتح مصر

مع جيش عمرو بن العاص وأشارك عمرو بن العاص في

تأسيس مصر وأخد اجر الفاتحين وأموت شهيد,

*أول أولوية فى حياتك عيلتك ولا شغلك ولا اصدقائك؟

غير ما سبق اول حاجه في اولوياتي رضاء ربي

فإذا كان هذا العمل يرضي ربي سأقوم به علي الفور

سواء كان * لدعوتئ* لأسرتي او عملي أو اصدقائي ,

*اوصف أجمل فطار ممكن تفطره؟

الأفطار الذي يحضره اناس احبهم في الله

* وخطيبتي * واهلي وعشيرتي

حتي ولو مش بدوده مش مشكله نوع الأكل ,

*لوانت حاكم على مجموعة من الأفراد حتكون عادل ؟

انا لا احب ان اكون مسؤلا او اسعي لذلك

لأنها مسؤليه وسأحاسب عنها واذا كلفت

بهذا العمل سأقوم فيهم خطيبا واقول مقولة

عمربن الخطاب اني وليت عليكم ولست بخيركم

فإن رأيتموني علي حق فأعينوني وان رأيتموني

علي باطل فقوموني,

*أكتر اعلامى مصرى بتحترمه؟

احمد منصور محاور قناة الجزيرة وفي الصحافه

الكاتب فهمي هويدي

*ممكن تشتغل شغلانة تانية كنت تتمنى تبقي ايه؟

كنت اتمني ان اكون مهندس الكترونيات

واخترع ما يفيد البشريه وأكون نموزج

مشرف للعالم المسلم

*اجمل فرح ممكن تحضره؟

فرح زوجين متفاهمين تعاهدا علي بناء بيت

كله حب واخلاص بيت قوي صلب لا تؤثر

فيه عواصف ومشكلات الحياه اليوميه:

*بتراعي كلام الناس والقيل والقال ؟؟

لا اراعي كلام كل الناس بل اراعي كلام المقربين

مني من يراني مخطئ فينصحني ولكن كلام العوام

من الناس لا التفت اليه فأنا اراقب ضميري اولا

هو ترمومتر اعمالي

*السعاده هى؟

ان تجد من تحب ومن احببته يبادلك نفس الشعور,

ومن الشقاوة ان تحب ومن تحب يحب غيرك :

*عندك أمل ؟ اسبابك ؟

نعم لدي امل , فلما ضاقت واستحكمت حلقاتها

فرجت وكنت اظنها لا تفرج من يقرأ التاريخ

يعرف ذلك جيدا ففي غزوة الخندق كان المسلمون

لا يأمنون علي قضاء حاجتهم وكانو محاصرين ,

والأمثله في التاريخ كثيره المهم الا نفقد الأمل
ولننظر الي محمد الفاتح رغم انه لم يكن صحابي او تابعي ,

*لما بتحب تهرب من كل شئ بتروح فين ؟

لم اعتاد الهروب ولا احبه بل احب ان اخلو بنفسي

وافكر في الحلول والبدائل لكي احل مشاكلي لأني

اذا لم اواجه المشاكل سأهزم من الجوله الأولي فأسارع

انا بالمواجه وليكن هناك سجالا بيننا ,اصرع الهموم وتصرعني ,

*بشجاعةامتى اول مرة خدت فيها نفس طويل وقلت ياااه انا فعلا كبرت ؟
حينما توفي والدي واصبحت المسؤل عن الأسره

ومشاكل اخوتي ,

*وايه شعورك اما ست او راجل بيشرب سجاير؟
كلاهما مخطئ في حق نفسة اولا ,
وفي الأخره سيندم علي ما فعل يوم لا ينفع الندم ,
وادعو الله لكلاهما بالهدايه , واشعر في داخلي بالأسي والحزن
علي ضياع عقول شبابنا وفتياتنا , وما آل اليه حالهم

*بتعرف ايدك اليمين من الشمال ازاى؟

لما بسلم علي صديق ايدي اليمين بتسبق الشمال ,

وفي الأكل هي بتعرف طريقها كويس ,

*اكتر الة موسيقية بتحبها ؟

مبحبش الموسيقي , لو الدف اله موسيقيه يبقي هوه ده,

*رأيك ليه الذوق والنخوة اتعدموا ؟

النخوه موجوده بس قلت

لو انعدمت , يبقي انا لزمتي ايه,
انت كدا بتغلط في الصعايده دول كلهم نخوه,
بس محتاجين حد ينفض من عليها التراب

*ايه الحاجة اللى لو حصلت لك حتبقى سعيد اوى ؟
اني اتجوز انا واخويا واكمل نصف ديني ,
وشايف الصوره اللي فوق ايوه , صورة الخليفه العثماني الأول
نفسي يرجع ومعاه الخلافه من جديد .

*يبقى عندك ارض زراعية ولااحدس عربيات ولاكام عمارة ولافلوس فى البنك ؟
مش بحلم بالحاجات دي انا بحلم ببيت هادئ وسعيد ,
من بات امناً في سربه عنده قوت يومه

فكأنما حيزت له الدنيا بحزافيرها,

*البحر ولا النيل؟

النيل افضل لأني لو عطشان هشرب من النيل

ولو انت زعلان المثل بيقولك اشرب من البحر

*مجنون ولا عاقل ؟

عاقل طبعاً, لو مكنتش عاقل لا تصل اليك

رسالتي ولما كنت اكتب اليك الأن

*تقرا كتاب ولا تتفرج على فيلم ؟

وما هو الفيلم؟ وما هو الكتاب؟ انا لا احكم علي شئ مبهم

فربمات يكون الكتاب لكاتب منافق او فكره مغلوط

وقد يكون الفيلم هادف ويحوي رؤيه وقصه استطيع

ان احصل منه علي عظه او غير ذلك او العكس صحيح

*تمرر التاج ده لمين ؟

أ/ جمال الدرواني , رئيس تحرير ناهيا الغد

لافتات علي الطريق

هاعيش واتحدي احزاني

نهياويه

الي كل مدون يتابع مدونتي ويرسل تعليق علي مدونتي

ثالثا/ مرحلة الجامعه

بسم الله الرحمن الرحيم

في بدايه المدونه بدأنا بعنوان معالم في الطريق تحدثنا عن بعض المعالم في

اولاً:فترة الكتاب

وثانيا:التعليم "الأبتدائي والأعدادي والثانوي"

ثالثا: مرحلة الجامعه

في هذه المرحله معالم كثيره وبداية انطلاقه قويه نحو المعرفه بكل فروعها

التحقت بكلية التجارة جامعة القاهره

ومع اول يوم في جامعة القاهره

بسم الله الرحمن الرحيم

وسع وسع انا رايح الجامعه وراكب اتوبيس 903

بوصلني لحد باب الكليه انزل قدام باب كليه التجاره

مين اللي واقف علي الباب ده بيقولي فين الكارنيه وانا لسه مطلعتهوش

المهم اطلع الورقه بتاع التنسيق خد يا عم *ادخل

*يااااااااااه ايه الجمال ده حدائق وجناين وكافيتريات طبعاً ماشي ولا بيدي

كابتن كابتن هي دي كليه تجارة

ايوه يا ابني " طب فين جدول المحاضرات "

شكلك جديد ومش عارف حاجه * روح هناك عند السكاشن

شكاشن ايه شكاشن دي كمان محبتشي اطول في الكلام معاه

علي شان شكله قرفان من الناس الجداد

وانا ماشي في الطريق لافتات كبيره ترحيب بالطلبه الجدد

واسره فلان والتيار الأسلامي واسرة حورس وعلاء الدين ايه العالم الغريب ده

الحاجات دي جديده / طب امشي واسأل بعدين ؟

أيه الحجرات الكتير دي اللي عامله زي عشش الفراخ

دي السكاشن وايه الجداول الكتير دي / كل الجداول دي تبقي سنه اولي

اولي : ا*ب*ج * د * ه * و

طب انقل اي جدول؟

بس بس كابتن / حضرتك فاهم من الجداول دي حاجه

مش عارف حاجه اسأل واحد قديم / ادور علي واحد قديم في وسط الزحمه دي

ممكن أسأل حضرتك سؤال * اسأل يا مستجد

/ ممكن اعرف انا في اي مجموعه من الجداول دي

بصلي وقال : اسمك ايه؟ انا قلت في عقلي دا عاوز يتعرف علي

قلت له شريف * قالي انقل جدول اولي "ب"ايه البشر اللي مش طايق نفسه ده؟

قلت له متشكر يا قديم

افتكرت مقوله احد اصدقاتي في ثانوي اللي بيقول فيها

"طالب الثانويه العامه عامل زي الجبنه القديمه كل ما يقعد فيها اكتر يحلو"

طبعا هو في الكليه اقدم مني يعني بيحلو زي الجبنه القديمه كل سنه؟

ابص في الجدول علي شان اعرف هوا معدول ولا مقلوب وايه الأسماء الغريبه دي

مدرج أ* مدرج ب* مدرج العيوطي * مدرج د

وايه المواعيد الغريبه دي السبت من الساعه 2 الي الساعه 8 مساء

طب اعمل ايه والمحاضره الأولي الساعه2

احسن حاجه اروح اكل في البيت واجيب ورقه وقلم
واجي الساعه2 ظهرا*

ارجع بقي من نفس الطريق اللي جيت منه علي شان متهش"

انا قررت من هذا الوقت اني اعمل كل حاجه نفسي فيها مسدقت خرجت بره القمقم اللي كنت محبوس فيه

اي نشاط هلاقيه هشترك فيه * رحلات * انضم لأسره * معسكرات * مسابقات *

يعني هندمج مع المجتمع الجديد بكل اشكاله وقررت احضر كل المحاضرات مش حبا في المحاضرات

المحاضره اللي مش هتعجبني احضر اي محاضره في كليه اخري في أي حاجه انا بحبها ,

وغالبا كليه دار العلوم والعب تنس طاوله في صاله دار علوم الجديده,

ولازم اعرف كل كبيره وصغيره في الجامعه واروح المكتبه المركزيه واعرف اقسام المكتبه

وانواع الكتب واعمل كارنيه استعاره خارجيه ,

عملت كارنيه واول كتاب يعجبني قررت استعارته

*الأستاذ مسؤل المكتبه يقولي دا نسخه نادره ممنوع استعارته ......معظم الكتب اللي

قررت استعارتها كتب تراث

, مش مشكله ارمي همومك ورا ظهرك وانطلق

رجعت الكليه الساعه 2 الظهر من نفس الطريق اللي روحت منه مضطر اسأل واحد تاني

كابتن هو فين مدرج "ب" طبعا مش عارف بيدخلوا منين مدرج ب في مبني العميد واصغر

مدرج بالكليه دخلت من الباب الرئيسي مش من الباب الخلفي وابص من الزجاج خير اللهم

اجعله خير حاجه ازحم من سوق الأثنين بتاع كرداسه كل الأماكن كمبليتو؟

انجليزي دا يا مرسي

لفيت من الباب الخلفي علي شان ده باب الدخول بتاع الدكاتوراول ما دخلت مدرج "ب"

زهلت من الأعداد الكبيره وفضلت متنح لحد ما واحد ابن حلال قالي في مكان اقعد

كنت حاسس اني انا الغريب في وسط الزفه دي كل الناس عارفه بعضها ماعدا انا

وهووووووب الدكتور وصل اول محاضره في حياتي احضرها

ماده السلوك الأنساني د/ كامل عمران

طول المحاضره ببص علي حد اعرفه في المدرج مفيش : بعد المحاضره لقيت طالبه من ناهيا

وكانت معايا في ابتدائي بس انا مش بكلم بنات ؟ ادور علي راجل مفيش *

"علي راي المثل الراجل ب100......؟

ما بين المحاضره الأولي والثانيه مش عارف اعمل ايه ؟

اتعرفت علي طالب بجانبي اسمه طارق من السويس

بس كان بينفض لي علي شان بيتعرف علي زميله بجواره *كنت فاكرها قريبته؟

عدد البنات في المدرج في مجموعة "ب" اكثر من البنين

تتكون مجموعه ب ابتداء من حرف" د" الي حرف" ط" تقريبا

وانتهي اليوم الدراسي بمحاضره رياضيات د/ سعد السعيد

انا محبتشي الرياضيات الا في فتره الثانويه في اخر سنه

عن طريق أ/ كمال الشيمي و المهندس / كمال طلبه

قبل كدا مكنتش بحب الرياضيات والرياضه البحته اللي اخدناها في الجامعه

كانت امتداد لرياضيات الثانويه العامه *

يعني مفيش مشكله في الماده دي اي حد محتاج مساعده من القسم الأدبي

ممكن اشرحهاله

ايه اليوم الطويل ده اروح بقي الوقت اتأخر وانا خايف لحسن الاقي ناهيا قفلت بدري

ايه ده في ناس بره المحاضره كتير انا كنت فاكر كل الناس داخل المحاضره ؟

كل واحد ماسك ودان واحده ..... ممكن نتعرف ؟

تقوله اسفه ههههيئ""""

وتاني يوم تلاقيهم خدوا علي بعض

وهاتك يا هزار باليد وب............بلاش ؟

كفايه كدا* دا اول يوم بس *في الفرقه الأولي كليه تجارة

فاصل ونواصل

في مدرسة كرداسه الثانويه

مدرسة كرداسه الثانويه المشتركه

في مرحلة التعليم الثانوي بمدرسة كرداسه بعض المعالم التي مازالت في خاطري اريد التعليق عليها سريعا

شكل المدرسة الخارجي سنة في الصف الأول الثانوي قبل الزلزال فوجئت بفارق كبير بين مدرسة

ناهيا الأعداديه وكرداسه الثانويه من حيث الشكل والتنظيم ؟؟ بين أ/ عبد الصمد بشندي مدير مدرسة ناهيا

وأ/ منير روفائيل مدير مدرسة كرداسه وشكل المدرسه الخارجي والداخلي ففي مدرسة كرداسه يوجد تل كبير

من القمامه يتم ازالته يوميا ويرجع كما كان وبالنسبه لشكل المرسة من الداخل مختلف ايضا حيث تقل مساحة المدرسه

الثانويه عن المدرسه الأعداديه بكثير والأشجار ومساحات الملاعب والمزروعات تقل او تنعدم في حوش مدرسة كرداسه وبالنسبه للفصول دهانات الجدران والأسقف تسقط اثناء الحصص واذا لامست الحائط تحتاج الي صديق يقوم بتنفيض حضرتك بمنفضة بتاع السجاد

دا من حيث المظهر طبعا انا قضيت ابتدائي واعدادي في ناهيا اما ثانوي هتغرب وهذهب لقريه مجاوره

يجتمع في هذه المدرسه ابناء ناهيا وكرداسه وابو رواش وبني مجدول وكفر حكيم

المواصلات الي المدرسه

سيارة او سيارتين بينقلوا طلبة ناهيا .اتذكر اسم واحد منهم عم / مسعد دا كان بيدخل بينا الي اقرب مكان للمدرسه

حيث تبعد المدرسه كثيرا عن المحطة المعتاده للسيارات في يوم الأثنين حيث السوق محدش يقدر يدخل بسياره

دا يدوب بالعافيه لو عرف يمشي من الزحمه اسهل حاجه للوصول للمدرسه ندخل اي شارع جانبي وتفضل تمشي

في شارع جوا شارع وعاطفه وراها عاطفه وتسال فلان وعلان لحد ما تتوه وواحد يوصلك للمدرسه ولو وصلت متأخر

تحاول تفلت من الباب باي حيله او تاخد عصيتين علي غيار ريق تدفي وتخش الحصه الأولي وانت منتعش...... ।

الحقونااااااااااااااااااااااااااااااااازلزال

بعد بداية الدراسه بكام شهر حدث زلزال انا كنت ساعتها بذاكر مادة التاريخ أ/ فايزه مدرسة التاريخ أ/ محترمه جدا

كانت مش بتلبس غير اللون الأسود والتكشير مش بيفارق وشها مش عارف ليه؟ محاولتش اسأل عن اللون ألا سود

ولا عن سبب التكشير بس كانت جاده جدا في الشرح والحزم داخل الفصل ।

في خبراء حضروا بعد الزلزال وكشفوا عن اسقف المدرسه فقرروا عدم صلاحية المدرسه وتنكيسها

يعني هوا الزلزال السبب؟ متعرفش بس ترفع راسك في السقف من داخل الفصل تحس انه كان محشي كنافه مش اسياخ حديد طب الطلبه هيروحوا فين لازم نفكر ؟؟؟؟؟

بس الحكومه قررت تعمل اكشاك خشبيه في الحوش بدل الفصول تخيل معايا بقي شكلها؟ اللي عاوز يكلم واحد في فصل

تاني يخرم الخشب ويكلمه ويسلم عليه وممكن مدرس يكون بيشرح لغه انجليزيه وتيجي في ودنك فرنساوي من شرح مدرس الفصل المجاور

قليل جدا في ثانوي بيشرح بضمير لكن في اعدادي كان العكس قمة الأخلاص في الشرح قليل جدا اللي بيكروت في الشرح من المدرسين الممتازين اللي اتذكرهم بخير ولهم كل التقدير والاحترام:

أ/مصطفي زهيري*مدرس احياء وأ/ بهاء * لغة عربيه*أ/ عبد الصمد *رياضيات*أ/صابر هديب * جغرافيا

بعد انتهاء الصف الأول الثانوي بدأ تنكيس المدرسه وبناء مدرسه جديده وانتقلنا فتره مسائيه بمدرسه اعدادي مجاوره

مشروع الصرف الصحي في كرداسه؟؟؟

بجمله الكوارث : الزلزال * السوق * الصرف الصحي *في مشكله في الوصول الي المدرسه

حيث بدأ مشروع الصرف الصحي وأنا في مدرسة كرداسه فقلب الشوارع رأسأ علي عقب والطريق بقي عبارة عن حفر ومطبات صعب السير فيها وتفاقمت المشكله في الوصول الي المدرسه واعتمدنا علي السير علي الأقدام وسط

الحفروالمطبات।ربنا يبعد عنك ولاد الأيه ولا يخيبك خيبة الجنيه

ويجعل اصحابك كلهم اخلاص ويكفيك شر سواقين الميكروباص

ويزود في ايدك النقديه ومتكلشي فولا ولا طعميه ....قادر يا كريم

من الأصدقاء المقربين لي في الديسك دائما اثنين من ناهيا الطالب / احمد سعيد عبد الحكيم والطالب /الشازلي من بني مجدول كنا احنا الثلاثه لا نفترق دائما في الديسك افترقنا فقط في الصف الثالث الثانوي حيث التحقت انا والشازلي بالقسم العلمي واحمد سعيد بالقسم الأدبي

كان اهم ما يميز الشازلي انه شاطر في الأنجليزي وأنا واحمد سعيد بنكره الأنجليزي موووووووووت

وطبعأ مدرس الأنجليزي أ/ صابر قنديل لما يحب يهزأ حد يوقفني انا واحمد سعيد ودائما كان يقولي أبقي قابلني لو فلحت

نفسي اقابله من زمان ولو صدفه مع اني عملت فتره بعد التخرج بالتدريس وقابلت مدرسين انجليزي كانو بيدرسولي

واصبحت مدرس مثلهم في اعدادي مثل أ/ محمد حامد وغيرهم الكثير الذين عملت معهم في نفس المهنه"

الأهلي..............والزمالك

الي ان وصلت الي الثانويه لم اعرف شئ عن الأهلي او الزمالك سوي لون الفانله فقط الي ان وجدت شجار في الفصل بسبب مباراة الأهلي والزمالك ومابين كل حصة واخري اجد مشاحنات كلاميه في مباريات الدوري وانا جالس مثل

الأخرص في المغني فقررت اتثقف كرويا واول ما انوي اشجع شجعت الأهلي مش عارف ليه بس قلت الأهلي اكبر شعبيه فوجئت بزميلي احمد سعيد متعصب زملكاوي مفيش حد في البيت من الصغير الي الكبير بيشجع الزمالك

فكنت اسأله عن مواعيد المباريات فكان حافظها من اول يوم يبدأ فيه الدوري فكان اول موسم بدأت اشجع فيه الأهلي

يخسر الدوري / انا من يومي واد فنان

انا من يومي احب الأهلي واموت في الأهلي

وبلعن اهله ويلعن اهلي

لو في الماتش ماجابشي اجوان

انا من يومي واد فنان

انا من يومي احب الكلمه

تكون في الحق

تبقي في وسط الضلمه سياسه

واوعاك يابني تقول دي خباسه

اصل الكلمه في مصر بتمشي

وسط حراسه ووسط كلابش

وقول ماتخافش ولا يهمكش

لو قضيت ليلتك في لماااااااان

وكفايه كدا علي شان الحيطان

ليها ؟؟؟؟؟؟؟؟؟؟؟؟؟؟؟؟؟؟

بعد كدا الأهلي اخد الدوري سبع سنوات متتاليه اللي بيقولو عليهم " سبع سنوات عجاف " علي الزمالك طبعاً

المدرسه الجديدة خلصة يا رجاله مبرووووووك

في الصف الثالث الثانوي تم الأنتهاء من بناء المدرسه وانتقلنا والحمد لله للمبني الجديد

والمحافظ افتتح المدرسه الديسكات جديده كل حاجه جديده في نصف العام كان كل شئ

انكشح وبان يعني الديسكات في الشتا اتكسرت وادفينا بيها في الحوش من البرد

حتي الباب الحديد في ناس عكاول او عتاول ضربوها بكتفهم وكسروا القفل والزي المدرسي كان بيطبق جديد النطلون الكحلي والقميص لبيض كان في ابيض ساده وابيض مقلم وابيض مشجر واللي يتزنق خالص يقلع القميص تلاقي تحته حاجه بيضه اسمها فانله يخش بيها المدرسه كلو كان بيشغل مخه في موضوع الزي في الأزاعة المدرسيه

أ/ بهاء مدرس اللغه العربيه كان بيقدم فقرة الأمثال الشعبيه الحاجه الوحيده اللي افتكرها من الأزاعة المدرسيه الي الأن كان كل يوم يصبحنا ببعض الأمثال الشعبيه ويشرحا

خد عند

ابن الديب مبيترباش ؟

ان مات حمار الملك الناس تعزي الملك وان مات الملك محدش يعزي الحمار؟

وكان بيحلل الأمثله من ذاك القبيل في الأزاعه*

واول ما اتقال المثل الأول المدرسه كلها ضحكت علي شان البواب اسمه محمد الديب

بس المقصود من المثل ان ابن الديب بيورث المكر مش محتاج علام؟

في مشهد اخر كان بيتكرر يوميا بتاع العيش كان بيعدي قدام المدرسه الصبح وينزل عيش ابيض للكانتين صوته مميز وهو بيقول

ابيض ابيض عاوز عيييشششش

كفايه كدا ثانويه عاميه ونروح الجامعة هيهههههههه

ونجحنا في الثانويه عقبال الأبتدائيه

مدرسة ناهيا الأعداديه المشتركه

يااااااه مدرسةحلوه*** ومدرسين احلي******* ومدير قائد وحكيم
بدايه مرحله جديده في حياتي مع مدرسة ناهيا الأعداديه المشتركه التي تعتبر نموزج مشرف لقرية ناهيا

وقياده أ/ عبد الصمد بشندي مدير المدرسه والذي ساهم بشكل كبير في ظهور المدرسه بشكل حضاري ونموزج يحتذي به بين المدارس الحكوميه ليس فقط لجمال مظهر المدرسة ولكن لحسن قيادته وحزمه فهو مدير ناجح بكل المقاييس

نبدا بأول ملاحظه علي المدرسه عدد الفصول في المدرسه سنه اولي اعدادي كان خرافي

اولي احداشر واولي خماشر و خمنتاشر
يعني العدد في الليمون وقسموهم علي فترتين انا نصيبي جه في فترة الظهر طبعا اول حاجه اتغيرت في حياتي المصروف

قفز قفزة مهوله 25قرش يعني ربع جنيه مع بدايه دخول المدرسه مش هتلاقي زباله امام المدرسه

والملعب نظيف والطابور منظم ولا انكر دور المدرسين كذلك في نجاح المدرسه

فلهم كل التقدير والأحترام

أ/ محمد حسنين *علوم أ/ محمد حامد * انجليزي أ/ عبد العزيز* رياضه أ/ فارس * لغة عربيه

وغيرهم الكثير ممن اكن لهم كل التقدير والأحترام

احب اعقب علي شئ مهم في هذه المرحله وهو

احترام المدرس قديما وحديثاً؟؟؟؟

للأسف احترام المدرس في طريقه الي الزوال لا اعرف الي الأن ما هي الأسباب هل اختلاف المدرسين او انحدار المستوي الأخلاقي للطلبه ام وزارة التعليم هي التي تحد من صلاحيات المدرس بمنع الضرب وبذلك يتمرد الطلاب ام جميع ما سبق ؟؟؟؟

علي العموم الجيل الذي حضر في المدرسه الأعداديه علي ايامي كان محترم مكنتش اسمع عن طالب تطاول علي مدرس

او واقف يهزر معاه بأسلوب غير محترم

في طابور المدرسه كان في معالم احب احكيها :::
اولاً: أ/ عبد الصمد مدير المدرسه كان بيحلق شعر الطلبه اللي شعرهم طويل وحالقين كابوريا وشكلهم بلطجيه

والعمود اللي في وسط الطابور شاهد علي كلامي في ناس كانت بتتعبط عليه .... فاكرين...................؟

ثانيا: في الطابور من ابرز من قرا القرأن بصوت جميل في ايامي الطالب / احمد الحاوي ....................

كذلك اسلوبه الجميل في القاء قصيدة / انا العبد الذي يغلق الأبواب مجتهدا علي المعاصي وعين الله تنظرني ...

ثالثا: في طالب اتعبط في وسط الطابورعلي شئ غريب جدا والدته بلغت المدير انه بيسرق الوز من الشارع ويروح

يبيعه في سوق كرداسه والطالب اتعبط وسط الطابور من أ/ عبد الصمد وكان بيعامل والدته بشكل غير محترم.....

انا انضربت عصيتين جامدين قوي علي الهروب من الحصه السادسه وكانت العاب ومحدش كان بيدينا العاب

نروح الحوش كلو يخبط في بعضه فمشيت مره قبل انتهاء اليوم الدراسي أ/ علي السطوحي ضربني عصيتين في الطابور

من حلاوتهم مش هنساهم طول عمري ...

رابعاً: انا كنت بنشد في الفصل يعني زملائي شافو ان صوتي حلو فرشحوني في المجال الفني وكذلك الرسم كنت برسم حلو وفي احدي مناسبات المولد النبوي طلبت لألقاء نشيد في الأزاعه والقيت نشيد نؤمن بالله كنت حفظته

في مسجد ابو بكر وانا صغير وفوجئت بتصفيق حاد بعد النشيد اتكسفت جدا وبعدها بطلت اطلع في الأزاعه

المدرسيه وكنت القيت نشيد اخر في المرحله الأبتدائيه ولقي اعجاب وتصفيق من الطلبه ايضا

من رواد الفصول اللي مش هنساهم طول حياتي الطالب / محمد طه الرفاعي رائد الفصل في الصف الأول والثاني الأعدادي

والطالب / محمد عباس شنن رائد الفصل في الصف الثالث الأعدادي انتخبناهم رواد فصول .اللي بيتكلم بيتكتب اسمه علي السبوره وفي اقرب فرصه مدرس يعدي يضرب اللي كان بيهيص وبيلعب في الفصل :

محمد عباس كان مشهور بمقدمه رائعة في الأزاعه المدرسيه وكان بيقعد في الديسك اللي امامي مع عادل الديب

وأنا كنت بقعد مع محمد يحي جاد عبد الشافي ومحمود شحاته

كان في الديسك اللي خلفي احمد الشرعه كان مشهور بالحفظ كان في قصه علينا في الصف الثالث كان الأستاذ يسأله السؤال

يجاوب كأنه بيقرأ من الكتاب

المدرسه كانت منظمه بشكل رائع وذلك لحسن ادارة أ/ عبد الصمد بشندي للمدرسه

في غرفة الزراعه / حيث الحمص الشام وأ/ مجاهد

حصة الزراعه كانت لزيزه كنت بروح عن نفسي من كثرة الحصص والضغط النفسي من المدرسين

من اروع الأماكن في مدرسة ناهيا الأعداديه غرفة الزراعه بشهادة وزارة التعليم حيث توجد حديقه خاصة بالمدرسه بجوار غرفة الزراعة يشرف عليها أ/ مجاهد وقد حصلت المدرسه علي عدد كبير من شهادات التقدير في المجال الزراعي

كذلك يوجد خلف المدرسه مساحة مزروعه لصالح المدرسه شكلها جميل بالأضافه الي الأشجار التي تحيط بالحوش وارض الطابور:

أ/ مجاهد في حصة الزراعه وأ/ محمد رواش طبيعي يبيعوا حمص الشام أ/ مجاهد في احدي الحصص عمل مربة جزر

وكانت لزيزه وعلمنا ازاي تتعمل حبيت اعمل ابو العريف وانفزها في البيت رغم معارضة والدتي

جبت الجزر والسكر ولخبط الدنيا في بعضها وحاولت اطلع في الأخر حاجه تشبه المربي ......مطلعتش

ازود سكر اقلل جزر مفيش فايده كان شكلي يكسف في البيت لحد ما رميتها ؟؟؟؟؟

بس يكفيني شرف المحاوله ...

نظراً لصعود طلبه الصف الخامس والسادس الي اعدادي والغاء سنه سته وبعد ما انا عديت رجعوا سنه سته حديثا

الدفعة المزدوجه دي كانت عامله مشكله في الأعداد فرفعوا التنسيق للوصول الي الثانويه العامه كلو بيزاحم علي مكان

استراحة ونذهب الي مدرسه كرداسه الثانويه

من أروع ما قرأت من الشعر

منذ ولدت و أنت تفخر بالاسلام ..... فمتى يفخر الاسلام بك
رحـــــــم الله فتى هـذب الدين شبـــــــابه

وارداً من منهل الهادي ومن نبع الصحابة

إن طلبت الجــــود منه فهو دوماً كالسحابة

أو نشـــــــدت العزم فيه فهو ضرغام بغابة

جاذبته النفـــــس للشر فلم يبد استجــــــابة

متـــــــقٍ لله تعلــو من يلاقيه المـــــــهابة

رقّ منــه القلب لكن زاد في الدين صـــلابة

بلســــــم للأرض يمحو عن محياها الكآبة

إن يقــم يوماً خطيباً يُسمعُ الصمَّ خطـــــــابَه

أو يسر في الدرب يوماً أبصر الأعمى جنابه

مسـلم يكفيــــه فخـراً أن للـدين انتسـابــــــه
...................................................................


العذاب الحقيقى

... ,أن تتذكر إنسانا عزيزا رحل بلا عوده .

أن تنادي بصوت مرتفع فلا يسمع صوتك

.أن تشعر بالظلم وتعجز عن الانتصار لنفسك

.أن تضطر إلى تغيير بعض مبادئك لتساير الحياة

.أن تضع أجمل مالديك تحت قدميك كي ترتفع عاليا وتصل إلى القمة

.أن تصافح بحرارة يدا تدرك تماما مدى تلوثها

.أن تغمض عينك على حلم جميل ... وتستيقظ على وهم مؤلم.

ما عـادَ يحويـني سكــوتي والبُكـــا *** أنا لستُ مجبولاً على الخذلانِ

أنا فـــي يميني الشمسُ تشرقُ عزة ً*** وأنـــا الثـريـا همــةً وتفـانـي

أنـا مسـلــــمٌ والمجــدُ يَقطُرُ كـالنـدى*** والعـزُ كـل العـزِ فـي إيـمانـي

أنـــا للحيـــاةِ رواؤُهـــا ودواؤُهـــا *** وأنـا الشهابُ إذا بـدا سـتـرانـي


بشائر النصــــــر لاحت في دجي الظلم** تزف في نورها البشري لذي الهمم

بشـــائر النصر تدعــــــو كل ذي شرف** ياطـــالب العــــــز ثق بالله واعتصم

فالنصــر ات وقد لاحــت كواكبه رغم*** اشتداد ظلام الـــــــموج والخضـــــم

هـــــم فتيـه طهـــر الاســـــــــلام انفسهم*** بتوبه فــارتوا مــــــن طيب القيم

قد ادركــــوا بضيـــاء العلــــم انهـم*** اهل المكـــــارم والتمكين في الامــــم

مكتوب على باب بلدنا :

..يا داخل بلدنا .. ومنك كتير

..بلاد الصغير .. بلاد الكبير

..وفيها اللي يهبر .. وفيها الوزير

..وفيها تأبح .. وسرك فى بير

..ده فارش شوارع .. ده نايم سرير

..مدردح .. مفتح .. واعمى ضرير

..وفيها الموظف .. وفيها المدير

..وحاضنة محمد .. وجورج و سمير

..وفيها التكاسي .. مراكب مراسي

..وزى ما أنت راسي ..هيافة .. وتفاهة

.. ووقفة نواصي

..لبانة .. ومعاكسة .. وشيشة و صفير

..وفيها كآبة .. وفيها ديابة

..ماتعرفش مولد ده ولا غابة

..شطارة وخيابة .. وسجن و نيابة

..وفيها المدمس .. وفيها الفطير

..وفيها العميل .. وفيها النخيل

..وفيها ترعنا .. وبواخر و نيل

..ومطرب يدندن يا عينى يا ليل

..ده قاعد يدندن .. ده نازل شخير

..وفيها المحمر .. وفيها المشمر

..وإيد فيها ناعمة .. وإيدك تشمر

..وناس فيها ماشية قفاها يقمر

..وفازة وجردل .. وقلة و زير

..بلاد الأوبيج .. بلاد الجنيه

..تعالى يا باشا .. وقرب يا بيه

..وإمتى .. ولماذا .. وهذا .. وليه

..وفيها اللي جاهل .. وعامل خبير

..بلاد السياحة .. بلاد النواحه

..وفيها بجاحه .. وفيها قباحه

..وخن .. وغرزه .. ومسجد وساحه

..وقبله .. ومنبر .. ومدنه .. وحصير

..بلاد اللي ظالم .. بلاد المظالم

..هتكسب برافو .. وشاطر .. عفارم

..تماين .. تدادي .. تهادي .. تسالم

..وفيها اللي يشكي رقبته تطير

..وفيها الملبس .. وفيها المدمس

..بتاكل .. وتقطم .. تحف .. و تغمس

..ومره تحشش .. ومره تخمس

..وعالم تنفس .. دخانها يطير

..وفيها المياتم .. وفيها ام هاشم

..وفيها المزور .. وفيها اللي خاتم

..وفيها المخزوق .. وفيها اللي حاكم

..وفيها اللي واطي .. وعامل أمير

..بلادنا الجميله .. جناين .. نجيله

..عمايل بتفرح .. وخيبه تقيله

..وعالم تبلطج .. وناس مالها حيله

..ممثل حكومه .. ممثل قدير

..بلادنا العجيبه .. طباعها غريبه

..بلادنا اللي جاهله .. بلادنا الأديبه

..بلادنا اللي طيبه .. بلادنا المريبه

..بلادنا اللى عايقه ومالها نظير

..بلدنا .. وطنا .. وموطن حمير

..ومقلب زباله .. وورد و عبير

..تاريخنا حضاره .. وحاضر حقير

..ده مش ضعف مني .. ولكن لأني

.عايش في بلدي .. مجرد أجير

الكوسه

بتخلي المسنود فرعون

يتفرعن فين مهما يكون

وتخلي الجاهل أستاذ

وتخلي الأحول هداف

والكوره الآوت ف الجون

للكوسه ف بلادي شئون

لو تعرف واحد ف الشرطه

راح تخرج من أجدع ورطه

والراجل اللي انت ظلمته

تلاقيه متلقح مسجون

أو تعرف شخصيه كبيره

شغاله ف البنك مديره

راح تاخد من غير ضمانات

كام قرض بمليون مليون

وهروبك طبعا مضمون

ويا عيني لو تعرف نايب

ف المجلس مش نايب خايب

راح تبني أبراج وهميه

أوراقها مظبوطه أكيد

وفلوس الناس المهريه

حتجيلك م الجيب للإيد

بعديها تروح المستشفى

وتقيد نفسك مجنون

أحكامك تسقط ف ساعتها

بعديها ترجع موزون

وإذا ساكن ف عماره جديده

وحبيبك راجل مسئول

فسيادتك من غير ما تقول

يركب لك فورا تليفون

ولو انت عندك عربيه

ونمرها سوده بنسرين

حتعدي أجدعها كمين

وحتكسر أوضحها إشاره

ماهو نمرك سوده جباره

ولا تعرف أيتها قانون

ولو انت بتعرف فران

أو واحد بياع جرنان

راح تاخد طلبك وحتمشي

من غير ولا دوشه ولا دور

والناس الغلبانه حتاخد

طلباتها بعدك وتغور

ماهو كله غيرك بيهون

ولو انت زميل الحلاق

راح تحلق اولها زبون

وإذا كنت بتعرف دكتور

حتعيش متطمن مسرور

وحتسلك ف لجان الشفوي

ومجال تعيينك موفور

وحتطلع فالتليفزيون

بالبدله وفيها الببيون

تتكلم وبكل بساطه

عن شرف المهنه المدفون

لكن لو شاعر غلبان

قلت اللي ف نفسك على طول

حيقولو مين قال لك قول

ويهاجمك مليون إنسان